Terug

’n Klain beetje zörgen

as de daag van guster
herinner ik mie mien laif
ik sleepte t kiend deur t dörp
ien zoo’n gruine kienderwoagen
vol mit boodschappen
n pak gele vla noast dien linkeroor
n puut sjips tegen dien rechter
konst bienoa gain oazem meer hoalen
en sums liep dat kopke zo rood aan
dat t tied wer om die vief-kilozak mit eerappels
van dien buukje te hoalen
joa doe hest wat mitmokt mit mie, mien laif
as de daag van guster
herinner ik mie mien laif
doe namst wroak
sleepste mie overaal mit hin
van ecodrome tot dairentoen
van ponniepaark tot oranjestad
zwembad ien en zwembad oet
ik kin nait zwemmen, en dat
waistoe dondersgoud
en din zaag ik die voak aan kaant gnivvelen
as pa ien doodsnood, langzoam ten onder ging
ien t ondaipe
en doe zwaaisde zulfs nog even
as taiken van oafschaid

joa ik heb wat mitmoakt mit die, mien laif

ik mok mie zörgen om die
sums hailveul zörgen om die, mien laif

as de daag van guster
herinner ik mie eerguster
doe vrougst geld veur de disco
en stakst nogmoals dien haand oet
want t is nait genog
ien n machteloze poging om nog
ainegzins autoriteit oet te stroalen
smeek ik die om om twaalf uur thoes te kommen
ien n even zoo'n vruchteloze poging
om mie serieus te nemen, schinkst mie
n klainerend laagje en zegst
‘’moar pa, om twaalf uur begunt t pas”
op mien knaaien geef ik tou en smeek nogmoals
om goud oet te kieken,en in ieder geval
n keer thoes te kommen
doe bloast mie n vlochteg haandkuske en
verdwienst langzoam in t duuster

ik mok mie zörgen om die
sums hailveul zörgen om die, mien laif

as de daag van guster
kiekst terug en
links en rechts, en helpst mie
noar de overkaant
mien kaar ligt vol boodschappen
zodat mien verlamde bain
der moar n beetje biehaangt
doe smeerst mie n broodje
doe schinkst mie kovvie ien
en doe zörgst der veur dat
ik nait noast de pot pis
wie kieken elkoar aan
en voag herinner ik mie
dat pak widde vla of gele vla, dat ondaipe en t zakgeld
ik bin kold, begun te rillen, ik begun te trillen
doe stopst mie lekker onder
zets t karretje ien n houk
en doe komst nog even terug
en doe kust mie op mien haand
en doe kust mie op mien waangen
en doe kust mie op mien wond
en langzoam verdwien ik ien t duuster

doe moks tie zörgen om mie,
zums hailveul zörgen om mie, mien laif
mok tie gain zörgen om mie,
mok tie gain zörgen om mie, mien laif

© Martin Korthuis